Sérstök framlög með barni

Foreldrar geta skipt með sér að greiða sérstök útgjöld vegna framfærslu barns, án aðkomu sýslumanns, séu báðir sáttir við það.

Foreldrar geta einnig gert formlegan samning um sérstakt framlag vegna framfærslu barns og óskað eftir staðfestingu samningsins hjá sýslumanni. Hægt er að innheimta greiðslu samkvæmt samningi sem sýslumaður hefur staðfest og er hún kræf með fjárnámi.

Hægt er að sækja um til TR að fá greitt út meðlag, menntunarframlag og sérstakt framlag sem ákveðið hefur verið með úrskurði sýslumanns, samningi staðfestum af sýslumanni, dómi eða dómsátt. Skilyrði er að viðtakandi greiðslu búi á Íslandi.

Útborgun TR á meðlagi og menntunarframlagi er bundin við fjárhæð einfalds meðlags. Útborgun TR vegna sérstaks framlags er einungis vegna útgjaldaliða sem tilgreindir eru í viðmiðunarfjárhæðum dómsmálaráðuneytisins og aldrei hærri fjárhæð en þar er tilgreind. Sjá nánar 67. gr. barnalaga nr. 76/2003.