Fara beint í efnið

Endurveiting íslensks ríkisfangs

Beiðni um endurveitingu íslensks ríkisfangs

Ísland heimilaði tvöfalt ríkisfang hinn 1. júlí 2003. Fyrir þann tíma missti íslenskur ríkisborgari íslenskt ríkisfang sitt við veitingu erlends ríkisfangs.

Einstaklingur, sem öðlaðist erlent ríkisfang fyrir 1. júlí 2003 og missti þar með íslenskt ríkisfang sitt, getur fengið íslenskt ríkisfang að nýju með því að óska eftir því við Útlendingastofnun. Skilyrði er að viðkomandi hafi búið eða dvalið á Íslandi eða átt samskipti við landið sem talin eru nægja til að halda íslensku ríkisfangi. 

Fái einstaklingur íslenskt ríkisfang veitt að nýju, öðlast ógift börn hans undir 18 ára aldri einnig íslenskt ríkisfang, ef hann hefur forsjá þeirra.

Athugið að norrænir ríkisborgarar, sem áður voru íslenskir ríkisborgarar, geta jafnframt sótt um endurveitingu íslensks ríkisfangs að öðrum skilyrðum uppfylltum. Sjá leiðbeiningar um endurveitingu íslensks ríkisfangs til norrænna ríkisborgara.

Umsókn

Umsóknir er aðeins hægt að leggja fram á pappírsformi.

Þeim má skila í þar til gerðan póstkassa í anddyri Útlendingastofnunar að Dalvegi 18 í Kópavogi eða með því að senda umsókn í bréfpósti á sama heimilisfang. Áður en það er gert er nauðsynlegt að greiða fyrir umsókn með millifærslu í banka og þarf greiðslukvittun að fylgja umsókn til staðfestingar. Einnig er hægt að leggja inn umsókn og greiða fyrir í afgreiðslu Útlendingastofnunar.

Kostnaður

Afgreiðslugjald er 13.500 krónur, sjá upplýsingar um greiðslu afgreiðslugjalds. Umsókn er ekki tekin til vinnslu fyrr en greiðsla hefur borist.

Afgreiðslutími

Hægt er að fylgjast með því hvaða umsóknir hafa verið teknar til vinnslu á síðunni staða mála og afgreiðslutími dvalarleyfa.

Fylgigögn

Sjá nánari leiðbeiningar varðandi kröfur til skjala. Ekki þarf vottun á íslensk vottorð.

  1. Umsókn í frumriti, vel útfyllt og undirrituð af umsækjanda.

  2. Afrit erlends vegabréfs umsækjanda og íslensks vegabréfs ef til er.

  3. Staðfest afrit af frumriti fæðingarvottorðs.

    Frumritið skal vera vottað með ‚apostille‘ vottun eða tvöfaldri staðfestingu, og síðan tekið af því staðfest afrit.

  4. Staðfest afrit eða frumrit þýðingar löggilts skjalaþýðanda á fæðingarvottorði.

    Þetta á við ef erlend vottorð eru á öðru tungumáli en ensku eða Norðurlandamáli.

  5. Gögn um veitingu núverandi erlends ríkisfangs.

  6. Búsetutímavottorð frá Þjóðskrá, ef við á.

    Vottorðið tilgreinir í hvaða landi eða löndum umsækjandi hefur átt lögheimili frá upphafi lögheimilisskráningar á Íslandi til dagsins í dag.

  7. Upplýsingar um tengsl við Ísland ef umsækjandi er fæddur erlendis og hefur aldrei búið á Íslandi – sjá 12. gr.

Viðbótargögn sem gæti þurft

  1. Staðfest afrit af frumriti hjúskaparvottorðs umsækjanda, ef stofnað var til hjúskapar erlendis.

    Frumritið skal vera vottað með ‚apostille‘ vottun eða tvöfaldri staðfestingu, og síðan tekið af því staðfest afrit.

  2. Staðfest afrit eða frumrit þýðingar löggilts skjalaþýðanda á hjúskaparvottorði.

    Þetta á við ef erlend vottorð eru á öðru tungumáli en ensku eða Norðurlandamáli.

  3. Gögn um slit hjúskapar, ef við á.

Fylgigögn umsókna fyrir börn

Viðbótargögn fyrir umsækjanda, sem sækir einnig um að barn hans yngra en 18 ára hljóti ríkisborgararétt með foreldri.

  1. Afrit erlends vegabréfs barns og íslensks vegabréfs ef til er.

  2. Staðfest afrit af frumriti fæðingarvottorðs barns.

    Frumritið skal vera vottað með ‚apostille‘ vottun eða tvöfaldri staðfestingu, og síðan tekið af því staðfest afrit.

  3. Staðfest afrit eða frumrit þýðingar löggilts skjalaþýðanda á fæðingarvottorði barns.

    Þetta á við ef erlend vottorð eru á öðru tungumáli en ensku eða Norðurlandamáli.

  4. Forsjárgögn.

    Á aðeins við ef annað foreldri fer með forsjá barns. Frumrit gagna skulu vera vottuð með ‚apostille‘ vottun eða tvöfaldri staðfestingu, og síðan tekið af þeim staðfest afrit. Ef gögnin eru á öðru máli en ensku eða Norðurlandamáli skal fylgja staðfest afrit eða frumrit þýðingar löggilts skjalaþýðanda.

  5. Samþykki forsjáraðila.

    Á aðeins við ef báðir foreldrar fara með forsjá barns.

  6. Samþykki barns á aldrinum 12-18 ára.

Lög

Íslenskur ríkisborgararéttur er endurveittur þeim sem misstu íslenskt ríkisfang sitt áður en Ísland heimilaði tvöfalt ríkisfang samkvæmt 18. grein laga um íslenskan ríkisborgararétt númer 100/1952.

Þjónustuaðili

Útlend­inga­stofnun