Fara beint í efnið

Lausn frá íslensku ríkisfangi

Beiðni um lausn frá íslensku ríkisfangi

Útlendingastofnun er heimilt að veita lausn frá íslensku ríkisfangi. Íslenskur ríkisborgari sem sækir um ríkisborgararétt í ríki þar sem tvöfaldur ríkisborgararéttur er ekki heimilaður, þarf að fá lausn frá íslensku ríkisfangi áður en honum er veitt erlent ríkisfang.

Lausnin er í flestum tilvikum skilyrt og gildir í eitt ár. Það þýðir að umsækjandi er ekki leystur formlega frá íslenska ríkisfanginu fyrr en upplýsingar berast um að viðkomandi hafi öðlast ríkisfang í erlendu ríki. Hafi það gerst innan árs frá því að lausnarbréf var gefið út er umsækjandi formlega leystur frá íslensku ríkisfangi.

Umsókn

Umsóknir er aðeins hægt að leggja fram á pappírsformi.

Þeim má skila í þar til gerðan póstkassa í anddyri Útlendingastofnunar að Dalvegi 18 í Kópavogi eða með því að senda umsókn í bréfpósti á sama heimilisfang. Einnig er hægt að leggja inn umsókn í afgreiðslu Útlendingastofnunar.

Kostnaður

Ekkert gjald er tekið fyrir umsóknir um lausn frá íslenskum ríkisborgararétti.

Fylgigögn

Sjá nánari leiðbeiningar varðandi kröfur til skjala. Ekki þarf vottun á íslensk vottorð.

  1. Gátlisti fyrir beiðni um lausn frá íslensku ríkisfangi. Vinsamlegast prentið gátlistann út og látið fylgja með umsókn. Merkja skal við þau gögn sem fylgja og þeim raðað í sömu röð og í gátlista.

  2. Umsókn skal skilað í frumriti, vel útfyllt og undirrituð af umsækjanda.

  3. Afrit íslensks vegabréfs umsækjanda og erlends vegabréfs ef við á.

  4. Staðfest afrit af frumriti fæðingarvottorðs.

    Frumritið skal vera vottað með ‚apostille‘ vottun eða tvöfaldri staðfestingu, og síðan tekið af því staðfest afrit.

  5. Staðfest afrit eða frumrit þýðingar löggilts skjalaþýðanda á fæðingarvottorði.

     Á aðeins við ef erlend vottorð eru á öðru tungumáli en ensku eða Norðurlandamáli.

  6. Búsetutímavottorð frá Þjóðskrá. Á eingöngu við ef búseta er hér á landi. Vottorðið tilgreinir í hvaða landi eða löndum umsækjandi hefur átt lögheimili frá upphafi lögheimilisskráningar á Íslandi til dagsins í dag.

Fylgigögn umsóknar fyrir börn

Viðbótargögn fyrir umsækjanda sem sækir einnig um að barn hans yngra en 18 ára hljóti lausn frá ríkisborgararétti með foreldri.

  1. Afrit úr vegabréfi barns.

  2. Staðfest afrit af frumriti fæðingarvottorðs barns.

    Frumritið skal vera vottað með ‚apostille‘ vottun eða tvöfaldri staðfestingu, og síðan tekið af því staðfest afrit.

  3. Staðfest afrit eða frumrit þýðingar löggilts skjalaþýðanda á fæðingarvottorði barns.

    Þetta á við ef erlend vottorð eru á öðru tungumáli en ensku eða Norðurlandamáli.

  4. Forsjárgögn.

    Á aðeins við ef annað foreldri fer með forsjá barns. Frumrit gagna skulu vera vottuð með ‚apostille‘ vottun eða tvöfaldri staðfestingu, og síðan tekið af þeim staðfest afrit. Ef gögnin eru á öðru máli en ensku eða Norðurlandamáli skal fylgja staðfest afrit eða frumrit þýðingar löggilts skjalaþýðanda.

  5. Samþykki forsjáraðila.

     Á aðeins við ef báðir foreldrar fara með forsjá barns.

  6. Samþykki barns á aldrinum 12-18 ára.

Lög

Íslenskur ríkisborgari er leystur undan íslensku ríkisfangi samkvæmt 13. grein laga um íslenskan ríkisborgararétt númer 100/1952.

Beiðni um lausn frá íslensku ríkisfangi

Þjónustuaðili

Útlend­inga­stofnun