Fara beint í efnið

Atvik í heilbrigðisþjónustu

Skráning atvika og viðhorf til þeirra er veigamikill þáttur í að efla öryggi í heilbrigðisþjónustunni. Öllum heilbrigðisstofnunum og starfstofum sjálfstætt starfandi sérfræðinga ber að tilkynna án tafar til embættis landlæknis öll alvarleg óvænt atvik sem verða. Einnig skal upplýsa sjúkling og nánustu aðstandendur hans þegar það á við.

Einstaklingum sem vilja kvarta yfir heilbrigðisþjónustu er bent á Kvartanir vegna heilbrigðisþjónustu.

Skráning óvæntra atvika í heilbrigðisþjónustu

Í lögum um landlækni og lýðheilsu segir: „Heilbrigðisstofnanir, sjálfstætt starfandi heilbrigðisstarfsmenn og aðrir sem veita heilbrigðisþjónustu skulu halda skrá um óvænt atvik í þeim tilgangi að finna skýringar á þeim og leita leiða til að tryggja að þau endurtaki sig ekki.  Með óvæntu atviki er átt við óhappatilvik, mistök, vanrækslu eða önnur atvik sem valdið hafa sjúklingi tjóni eða hefðu getað valdið sjúklingi tjóni.“

Samkvæmt sömu lögum ber heilbrigðisstarfsmönnum sem hlut eiga að máli, faglegum yfirmönnum þeirra og öðru starfsfólki heilbrigðisstofnana, eftir því sem við á, skylda til skrá öll slík óvænt atvik.

Árið 2013 var tekin í notkun rafræn atvikaskráning í Sögu-kerfinu sem mjög margar heilbrigðisstofnanir nota. Embætti landlæknis hefur aðgang að þeirri skráningu.

Til að auðvelda þeim skráningu sem ekki nota Sögu-kerfið hefur embættið látið útbúa sérstök eyðublöð fyrir atvikaskráninguna. 

Atvikaskráning. Atvik sem sjúklingur verður fyrir - Sniðmát fyrir stofnanir. Eingöngu til notkunar á heilbrigðisstofnun eða hjá heilbrigðisstarfsmanni. Sendist ekki til embættis landlæknis.

Hvað á að senda embætti landlæknis?

Heilbrigðisstofnanir, sjálfstætt starfandi heilbrigðisstarfsmenn og aðrir sem veita heilbrigðisþjónustu eiga að senda landlækni reglulega yfirlit um öll óvænt atvik eftir nánari ákvörðun landlæknis.

Þar sem embættið hefur aðgang að atvikaskráningunni í Sögu-kerfinu þurfa notendur þess ekki að senda sérstakt yfirlit.

Hins vegar þurfa þeir sem ekki eru með Sögu-kerfið að skila yfirliti til embættis landlæknis um slík atvik tvisvar sinnum á ári, 1. mars og 1. september

Yfirlit yfir atvik sem sjúklingar/notendur heilbrigðisþjónustu verða fyrir. Sendist til embættis landlæknis tvisvar á ári


Viðbrögð við atvikum

Fjölmargar rannsóknir hafa sýnt að orsakir atvika eru í flestum tilfellum ágallar í skipulagi en ekki sök einstaklinganna sem vinna verkið. Eitt af því sem einkennir góða heilbrigðisþjónustu eru markvissar aðgerðir til að koma í vega fyrir atvik.

Brýnt er að bregðast við atvikum með viðeigandi hætti til að draga eins og mögulegt er úr hugsanlegum skaða og til að fyrirbyggja sams konar atvik. Embætti landlæknis hefur þýtt og staðfært leiðbeiningar um viðbrögð við atvikum.

Lög og reglugerðir

Þjónustuaðili

Embætti land­læknis