Kvartanir, athugasemdir og almenn erindi vegna heilbrigðisþjónustu

• Samkvæmt 2. málsgrein 12. greinar laga um landlækni og lýðheilsu

Notendur heilbrigðisþjónustu geta sent formlega kvörtun til embættis landlæknis ef þeir telja að mistök eða vanræksla hafi átt sér stað þegar heilbrigðisþjónusta var veitt.

Einnig er heimilt að bera fram formlega kvörtun við embætti landlæknis ef notendur telja að framkoma heilbrigðisstarfsmanna við veitingu heilbrigðisþjónustu hafi verið ótilhlýðileg. Mikilvægt er að rökstyðja í hverju mistök, vanræksla og/eða ótilhlýðileg framkoma felst.

Dæmi - mistök eða vanræksla

• Röng meðferð beinbrots (hugsanleg mistök)

• Niðurstöðu rannsóknar ekki fylgt eftir (hugsanleg vanræksla)

Dæmi - ótilhlýðileg framkoma

• Heilbrigðisstarfsmaður missir stjórn á skapi sínu. Óviðeigandi talsmáti eða hegðun heilbrigðisstarfsmanns sem myndi teljast óviðeigandi í hvers kyns mannlegum samskiptum.

• Samkvæmt 28. grein laga um réttindi sjúklinga

Notendur heilbrigðisþjónustu hafa samkvæmt lögum rétt til þess að gera athugasemdir við þjónustu heilbrigðisstofnana eða heilbrigðisstarfsfólks. Lögin segja að slíkum erindum skuli beint til yfirstjórnar viðkomandi stofnunar / starfstofu sem er skylt samkvæmt lögunum að svara skriflega án ónauðsynlegra tafa.

Berist embætti landlæknis erindi, sem ekki falla undir lið A hér að ofan en geta talist athugasemd við þjónustu, eru þau framsend til yfirstjórnar / yfirmanns viðkomandi stofnunar / starfstofu til meðferðar og afgreiðslu.

Dæmi - athugasemdir við þjónustu sem beina skal til viðkomandi heilbrigðisstofnunar / starfsstofu

• Athugasemdir eða beiðnir um sjúkraskrár. Afhending sjúkraskrár eða beiðni um leiðréttingu á skráningu í sjúkraskrá skal beina til viðkomandi þjónustuaðila þar sem sjúkraskrá er varðveitt. Nánari leiðbeiningar varðandi sjúkraskrármál.

• Athugasemdir við ónóga mönnun faglærðs heilbrigðisstarfsfólks.

• Ég fæ ekki mikilvæga lyfjaendurnýjum fyrir barnið mitt sem getur ekki sinnt samskiptum sjálft.

• Fyrirspurnir vegna biðtíma til læknis, biðtíma eftir aðgerð.

• Langur biðtími eftir aðgerð, meðferð, þjónustu.

• Óánægja með viðmót starfsfólks.

• Þjónusta á öldrunarstofnun er skert eða slæm hvað varðar aðbúnað, umönnun eða félagslega þætti.

• Samkvæmt 1. málsgrein 12. greinar laga um landlækni og lýðheilsu

Embætti landlæknis er skylt að sinna erindum er varða samskipti almennings við veitendur heilbrigðisþjónustu. Þá ber embætti landlæknis að leiðbeina þeim sem leita til embættisins um málefni heilbrigðisþjónustunnar. Slíkum erindum er svarað í samræmi við efni þeirra svo fljótt sem auðið er.

Dæmi - erindi sem beina skal til annarra stofnana

• Bætur fyrir líkamlegt eða geðrænt heilsutjón sem verður vegna meðferðar eða rannsóknar - Slys og sjúklingatrygging

• Bætur vegna slysa - Slys og sjúklingatrygging

• Tilkynning um aukaverkanir lyfja

• Tilkynning um skort á lyfjum

• Upplýsingar fyrir brotaþola - þar með talið kyferðisbrot