Fara beint í efnið

Umsókn um sjúkratryggingu

Umsókn um sjúkratryggingu

Þeir sem flytja lögheimili sitt til Íslands þurfa almennt að bíða í 6 mánuði eftir því að verða sjúkratryggðir. Þessir aðilar eru því ósjúkratryggðir fyrstu sex mánuðina og greiða á meðan fullt gjald fyrir heilbrigðisþjónustu.

Vinsamlegast athugið, senda skal inn umsókn degi eftir að gengið hefur verið frá lögheimilisskráningu hjá Þjóðskrá. Annars er hætta á því að umsókn berist ekki.

Undantekningar frá biðtíma

Ef þú kemur frá öðru Norðurlandi

Til að flýta fyrir afgreiðslu bendum við á að skila inn afriti (framhlið og bakhlið) af gildu evrópsku sjúkratryggingakorti með umsókn.

Ef þú kemur frá EES landi, Grænlandi, Færeyju, Bretlandi eða Sviss

Einstaklingar sem flytja til Íslands frá EES landi, Grænlandi, Færeyjum, Bretlandi eða Sviss þurfa að senda inn umsókn um sjúkratryggingu til þess að geta verið sjúkratryggðir innan 6 mánaða frá lögheimilisskráningu.

Ef einstaklingar hafa verið tryggðir í opinberu kerfi í fyrra búsetulandi verða þeir sjúkratryggðir þegar svar hefur borist frá fyrra búsetulandi. Aðrir fara á 6 mánaða biðtímann.

Ef þú ert aðstandandi einstaklings með ríkisfang innan EES

Ef ert skráður maki eða barn einstaklings sem er með ríkisfang innan EES og sjúkratryggður á Íslandi getur þú átt rétt á sjúkratryggingu án sex mánaða biðtíma.

Til að sækja um

  1. Hafa skráð lögheimili á Íslandi

  2. Hafa rafræn skilríki til innskráningar

Eftirfarandi þurfa ekki að sækja um

Ef eitt af eftirfarandi á við um þig er óþarft að sækja um sjúkratryggingu. Þú verður sjálfkrafa sjúkratryggð(ur) ýmist eftir sex mánaða biðtímann eða strax ef fyrsta atriðið á við þig.

  • Flutt til baka til Íslands frá einu Norðurlandanna innan tólf mánaða frá flutningi erlendis. Þú verður sjálfkrafa sjúkratryggð(ur) þegar lögheimili hefur verið skráð á Íslandi.

  • Flutt er til Íslands frá landi utan EES. Þú verður sjálfkrafa sjúkratryggð(ur) sex mánuðum eftir að lögheimili var skráð á Íslandi.

  • Þú varst ekki með sjúkratryggingu í fyrra tryggingarlandi eða varst aðeins með einkatryggingu. Þú verður sjálfkrafa sjúkratryggð(ur) sex mánuðum eftir að lögheimili hefur verið skráð á Íslandi.

  • Þú ert ríkisborgari lands utan EES. Þú verður sjálfkrafa sjúkratryggð(ur) sex mánuðum eftir að lögheimili hefur verið skráð á Íslandi.

Algengt er að einstaklingar kaupi einkatryggingu þar til réttur til opinberrar sjúkratryggingar verður virkur.


Læknisfræðilegar undanþágur

Til eru læknisfræðilegar undanþágur þar sem þú gætir haft rétt á sjúkratryggingu án þess að uppfylla öll skilyrði. Tæmandi undanþágur eru taldar hér:

Sjúkratryggingastofnuninni er heimilt að gera undanþágur frá skilyrði 1. mgr. 10. gr. laga nr. 112/2008, um sjúkratryggingar, um tímabil búsetu áður en einstaklingur verður sjúkratryggður, í eftirfarandi tilvikum:

  • Þegar um er að ræða nauðsynlega þjónustu í skyndilegum sjúkdómstilfellum.

  • Þegar um er að ræða námsmann sem flutt hefur lögheimili sitt frá Íslandi á námstíma vegna náms erlendis og flytur aftur til Íslands innan sex mánaða frá námslokum.

  • Þegar um er að ræða nýrnasjúkling sem þarfnast reglulega meðferðar í nýrnavél eða sjúkling sem þarfnast súrefnis. Undanþágan tekur einungis til nefndrar meðferðar.

  • Þegar um er að ræða einstakling sem haldinn er lífshættulegum sjúkdómi og flytur hingað til lands til varanlegrar búsetu, enda hafi hann áður verið búsettur hér á landi í a.m.k. 20 ár og eigi hér nána ættingja. Sama á við um barn undir 20 ára aldri sem haldið er lífshættulegum sjúkdómi og flytur hingað til lands með foreldrum eða foreldri sem uppfyllir framangreint skilyrði um búsetu.

  • Þegar um er að ræða einstakling sem hefur yfirgefið búseturíki vegna vopnaðra átaka eða aðstæðna af sambærilegum alvarleika, svo sem náttúruhamfara, getur sjúkratryggingastofnun gert undanþágu vegna nauðsynlegrar heilbrigðisþjónustu.

Ef þú telur eitthvað af þessu eiga við þig, hafið samband við international@sjukra.is Læknisvottorð þarf að fylgja umsókninni sem rökstyður undanþáguna.

Umsókn um sjúkratryggingu

Þjónustuaðili

Sjúkra­trygg­ingar