Sameiningin tekur gildi 1. janúar 2027.

Markmiðið með sameiningu má í grófum dráttum flokka í þrennt.

• Í fyrsta lagi að gera þjónustu við almenning eins góða og hægt er.

• Í öðru lagi að hámarka nýtingu þess fjármagns sem ráðstafað er til reksturs sýslumanns og verkefna hans.

• Í þriðja lagi að vinna markvisst að þeim markmiðum sem stefnt er að í byggðaáætlun og stefnuáherslu ríkisstjórnar, þar á meðal að efla og standa vörð um grunnþjónustu hins opinbera á landsbyggðinni.

Gert er ráð fyrir að það verði sömu 27 starfsstöðvar og eru í dag og að starfsfólk flytjist sjálfkrafa yfir í hið nýja embætti sýslumanns.

Þjónustan helst að meginstefnu óbreytt við gildistöku sameiningarinnar.

Með nýju embætti sýslumanns er stefnt að því að stuðla að eflingu þjónustu hins opinbera gagnvart almenningi í samræmi við væntingar til nútímaþjónustustofnana. Sameiningin leiðir til þess að landið verður að einu umdæmi og til sögunnar heyra staðbundnar valdheimildir á sama málefnasviði sem í dag skiptast milli níu jafnsettra stjórnvalda. Þannig standa vonir til þess að málsmeðferðin verði samræmdari, einfaldari, skilvirkari, gagnsærri og vandaðri út frá upplifun almennings.

Markmiðið er að sýslumannsembættið veiti framúrskarandi þjónustu, óháð búsetu og staðsetningu starfsstöðvar, hvar og hvenær sem er, eftir því sem hentar almenningi hverju sinni. Þannig er stefnt að því að skipulag þjónustu sýslumanns taki jafnframt mið af þörfum íbúa fyrir staðbundinna þjónustu.

Með sameiningu sýslumannsembætta er ætlunin að fylgja eftir þeim markmiðum og áherslum sem fram koma í stefnumótandi byggðaáætlun fyrir árin 2022-2036 og í því felst að efla opinbera þjónustu á landsbyggðinni, fjölga atvinnutækifærum og bæta ríkisrekstur.

Starfsstöðvar sýslumanns um land allt halda áfram starfsemi sinni og lögð er sérstök áhersla á að standa vörð um þjónustu og störf á landsbyggðinni. Markmiðið með sameiningunni er að tryggja jafnt aðgengi að þjónustu óháð búsetu og styrkja starfsemina um land allt.

Sýslumanni ber að tryggja að hið minnsta 65% stöðugilda embættisins séu hverju sinni á landsbyggðinni. Við skipulagningu nýs embættis þykir mikilvægt að sýslumaður vinni í samræmi við gildandi stefnur og áherslur ríkisstjórnar og leiti tækifæra, bæði innan sem utan málaflokksins, til að færa verkefni frá höfuðborgarsvæðinu til landsbyggðarinnar.

Dómsmálaráðuneytið hefur yfirumsjón með undirbúningi sameiningarinnar í samstarfi við sýslumannsembættin, helstu haghafa og síðar, nýjan sýslumann.

Upplýsingar verða aðgengilegar á vef sýslumanna. Einnig er hægt að senda fyrirspurnir á dmr@dmr.is.