Þeir sem njóta alþjóðlegrar verndar á Íslandi og dveljast löglega í landinu geta sótt um ferðaskírteini fyrir flóttamenn til ferða til útlanda.
Umsókn
Umsóknum er aðeins hægt að skila á pappírsformi, annað hvort í þar til gerðan skilakassa í anddyri Útlendingastofnunar að Dalvegi 18 í Kópavogi eða með því að senda umsókn í bréfpósti á sama heimilisfang. Einnig er hægt að leggja inn umsókn og greiða fyrir í afgreiðslu Útlendingastofnunar eða hjá embættum sýslumanna utan höfuðborgarsvæðisins.
Umsókn skal vera í frumriti, vel útfyllt og undirrituð af umsækjanda, eða forsjáraðila/-aðilum ef sótt er um fyrir barn yngra en 18 ára.
Fylgigögn umsóknar
Ef umsækjandi hefur í fórum sínum vegabréf útgefið af heimaríki eða ferðaskilríki útgefin af öðrum ríkjum, verður hann að skila þeim með umsókn. Ef vegabréf heimalands er útrunnið þarf að skila inn afriti af öllum blaðsíðum vegabréfsins.
Ef umsækjandi hefur áður fengið útgefið ferðaskírteini frá Útlendingastofnun, verður hann að skila því með umsókn um nýtt ferðaskírteini.
Umsókn samþykkt
Þegar umsókn hefur verið samþykkt er umsækjandi boðaður í myndatöku.
Þegar ferðaskírteinið er tilbúið þarf umsækjandi að sækja það og greiða 6.000 króna afgreiðslugjald.
Umsókn synjað
Heimilt er að synja útgáfu ferðaskírteinis þegar:
Ekki er staðfest hver umsækjandi er eða vafi leikur á um hver hann er.
Umsækjandi er eftirlýstur af lögreglu, gefin hefur verið út handtökuskipun á hendur honum eða lagt á hann farbann. Fram er komin kæra á hendur umsækjanda fyrir refsivert brot sem ætla má að varði fangelsisrefsingu.
Umsækjandi hefur hlotið endanlegan dóm fyrir mjög alvarlegt afbrot og er talinn hættulegur samfélaginu.
Ástæður sem varða öryggi ríkisins eða stefnu stjórnvalda í utanríkismálum mæla gegn því.
Réttindi og skyldur
Ef ferðaskírteini glatast eða eyðileggst skal tilkynna lögreglu og Útlendingastofnun það þegar í stað með því að fylla út tilkynningu um glatað ferðaskilríki.
Afturköllun
Ferðaskírteini fyrir flóttamenn skal afturkalla þegar
handhafa þess er vísað frá landi á grundvelli brottvísunar
handhafi þess útvegar sér ferðaskilríki heimaríkis
handhafi þess missir réttarstöðu sína sem flóttamaður við það að fá íslenskan ríkisborgararétt eða ríkisborgararétt annars ríkis eða missir hana á annan hátt
handhafa þess er samkvæmt lögum bannað að yfirgefa landið
brottför handhafa frá landinu mundi fara í bága við dóm, úrskurð eða ákvörðun stjórnvalda
útliti eða efni þess hefur verið breytt á ólögmætan hátt
Heimilt er að afturkalla ferðaskírteini fyrir flóttamenn þegar
það hefur skemmst eða er ónothæft af öðrum ástæðum
ljósmynd eða upplýsingar í því svara ekki lengur til auðkenna handhafa
það finnst í vörslu óviðkomandi aðila
handhafi þess hefur ekki lengur leyfi til dvalar hér á landi.
Lög
Ferðaskírteini fyrir flóttamenn er gefið út á grundvelli 1. málsgreinar 46. greinar laga um útlendinga, 1. greinar laga um vegabréf og 17. greinar reglugerðar um íslensk vegabréf.
Þjónustuaðili
Útlendingastofnun