Umframafli

Við lok skráningu löndunar í löndunarkerfi Fiskistofu er magnið borið saman við aflamarksstöðu skipsins. Hafi skip ekki aflaheimildir fyrir þeim afla sem það veiðir lendir það í umframafla (fer á rautt).

Skip í umframafla

• Útgerðaraðili skipsins fær tilkynningu í pósthólf útgerðar á Ísland.is um að skipið sé í umframafla.

• Útgerðaraðili hefur fjóra virka daga til að laga stöðuna. Ef aflamarksstaðan er ekki löguð innan þess tíma getur komið til sviptingar veiðileyfis.

• Skipið má ekki stunda veiðar í atvinnuskyni fyrr en aflamarksstaðan hefur verið löguð.

  • Athugið að óheimilt er að hefja veiðiferð skips nema það hafi aflaheimildir sem líklegt er að dugi fyrir afla í veiðiferðinni.

Hægt er að fylgjast með aflamarksstöðu einstakra skipa á gagnasíðum Fiskistofu.

Umframafli á strandveiðum

Heimilt er að landa að hámarki 650 kg af slægðum afla í þorskígildum talið í hverri veiðiferð. Fari afli í veiðiferð yfir það magn er um að ræða umframafla á strandveiðum.

• Umframafli á strandveiðum sætir sérstöku gjaldi sem miðast við meðalverð á samsvarandi afla á þeim stað og því tímabili þegar hann barst að landi.

• Gjaldið er innheimt eftir hvern mánuð og rennur í Verkefnasjóð sjávarútvegsins. 

• Allur umframafli sem veiðist á strandveiðum er dreginn frá heildar magni sem ráðstafað er til strandveiða.

• Ufsi sem landað er á strandveiðum og er merktur sérstaklega sem strandveiðiafli í Verkefnasjóð sjávarútvegsins reiknast ekki til umframafla.

  • Skylt er að landa þeim afla á fiskmarkað og fær útgerð 80% af andvirði aflans að frádregnum hafnargjöldum og kostnaði við uppboðið.