Flutt til útlanda

Sá sem flyst til útlanda og hættir að eiga lögheimili hér á landi verður lögum samkvæmt að tilkynna það Þjóðskrá Íslands áður en hann fer.

Flutt milli landa

  • Þegar einstaklingur eða fjölskylda hefur ákveðið að flytjast búferlum til útlanda er að mörgu að hyggja.
  • Þegar flutt er til einhvers hinna Norðurlandanna er nauðsynlegt að tilkynna sig og sína hjá þar til bæru stjórnvaldi í sveitarfélagi sem flutt er til, vegna ýmissa réttinda sem flytjast milli landanna. Framvísa þarf persónuskilríki eða vegabréfi og gefa upp íslenska kennitölu.
  • Ef flutt er til landa utan Norðurlanda er nauðsynlegt að kynna sér vel hvaða reglur gilda um dvalar- og atvinnuleyfi í landinu og athuga hvort vegabréfsáritun er nauðsynleg. Æskilegt er afla sér upplýsinga um þær breytingar sem verða á réttindum og skyldum hvers og eins við flutning lögheimilis frá Íslandi.
    Flutningur milli landa á vef Sjúkratrygginga Íslands
  • Athuga hvort vegabréf eru gild og sækja um ný ef þarf. Tilkynna til Þjóðskrár Íslands að lögheimili verði flutt og gefa upp fullt aðsetur erlendis.
    Upplýsingar um vegabréf


Vegabréf á island.is

 

  • Athuga hvaða persónuskilríki og skírteini gilda í viðkomandi landi, sækja um ný ef þarf og afla tilskilinna leyfa og vottorða sem nauðsynlegt er að framvísa í viðkomandi landi, til dæmis vegna:
    • atvinnu
    • menntunar – eigin náms og náms barna
    • húsnæðis
    • heilsugæslu
    • almannatrygginga
    • skatta og annarra opinberra gjalda
    • ökuréttinda
  • Ef börn og unglingar flytja til útlanda með foreldrum sínum er nauðsynlegt að kynna sér vel hvernig menntakerfið í viðkomandi landi er upp byggt. Huga þarf sérstaklega að því hvernig tungumálakennslu fyrir innflytjendur á öllum aldri er háttað.
  • Svokallaðir íslenskuskólar, ætlaðir börnum og unglingum, eru starfandi í nokkrum löndum og fást upplýsingar um þá á vefjum íslenskra sendiráða og Íslendingafélaga í viðkomandi löndum.
    Íslenskar sendiskrifstofur í útlöndum
  • Ísland og ýmis erlend ríki og ríkjasambönd hafa gert með sér milliríkjasamninga um gagnkvæm réttindi og skyldur borgara sem flytjast milli landa.
    Samningar á milli landa á vef TR
    Samningar milli landa á vef Sjúkratrygginga
    Tvísköttunarsamningar Íslands við önnur ríki, rsk.is
  • Ýmsar upplýsingar um flutning til útlanda má finna á vefjum íslenskra sendiráða í viðkomandi löndum og einnig hjá Íslendingafélögum sem starfrækt eru víða um heim.

    Íslenskar sendiskrifstofur í útlöndum

  • Greiða þarf toll af búslóðum og bifreiðum sem flutt eru milli landa. Nánari upplýsingar má finna á vefjum erlendra tollayfirvalda.
    Fróðleikur og tenglar um tollamál á vef Tollstjóra
  • Íslenskir ríkisborgarar halda rétti sínum til Alþingis- og forsetakosninga í 8 ár eftir að lögheimili hefur verið flutt til útlanda.
    Umsókn íslensks ríkisborgara sem búsettur er erlendis um að vera tekinn á kjörskrá
  • Kosningarréttur í sveitarstjórnarkosningum fellur niður við flutning lögheimilis úr landi.