Tekjuáætlun lífeyrisþega 2013

27.11.2012

Lífeyrisþegar geta nú skoðað og lagað tillögu Tryggingastofnunar að tekjuáætlun 2013 á Mínum síðum á vef Tryggingastofnunar. Hægt er að breyta tekjuáætlun vegna janúargreiðslu til 12. desember. Í janúar fá lífeyrisþegar senda greiðsluáætlun fyrir árið 2013 sem tekur mið af þeirri tekjuáætlun sem liggur fyrir. Mikilvægt er að lífeyrisþegar leiðrétti tekjuáætlunina ef þörf er á, en það er alltaf á ábyrgð lífeyrisþega að hún sé rétt. Við innskráningu þarf kennitölu og aðalveflykil ríkisskattstjóra eða rafræn skilríki á debetkortum frá bönkunum. Ef veflykill hefur glatast er hægt að nálgast nýjan á næstu skattstofu eða fá hann samstundis í heimabanka. Ef það hentar geta lífeyrisþegar veitt öðrum umboð til þess að sinna sínum málum á Mínum síðum. Hægt er að fá tekjuáætlunina senda heim á pappír ef þess er óskað með því að hafa samband við þjónustumiðstöð Tryggingastofnunar eða umboð um land allt.
Fréttatilkynning Tryggingastofnunar