Gætum að dýrunum um áramót

29.12.2011

Áramótin nálgast og þá er nauðsynlegt að muna sérstaklega eftir dýrunum enda mörg hver hrædd við sprengingar og læti sem fylgja flugeldum. Dæmi eru um að þau reyni að forða sér og strjúki að heiman, jafnvel til fjalla. Hestar á útigangi hafa ærst og brotið sér leið út úr girðingum og í veg fyrir umferð með alvarlegum afleiðingum. Dýraeigendur geta gripið til ýmissa ráðstafana, ef þeir vita til þess að dýrum þeirra líði illa á þessum tíma. Það helsta sem hægt er að gera er eftirfarandi:

  • Hafa dýrin lokuð inni, loka og byrgja glugga og hafa útvarp í gangi. Yfirleitt er best að hafa ljósin kveikt, til að draga úr ljósaglömpum. En í sumum tilfellum getur verið gott að gefa dýrunum kost á að koma sér í felur innandyra.
  • Í þéttbýlinu er best er að halda köttum alveg inni dagana í kringum áramót og hafa hunda í taumi þegar þeim er hleypt út.
  • Ef ofangreint er ekki talið nægjanlegt, þá er gæludýraeigendum ráðlagt að tala strax við sinn dýralækni og tímanlega fyrir áramót og fá ráðleggingar og jafnvel lyf við þessum vanda. En varhugavert er að gefa dýrum róandi lyf nema í samráði við dýralækni.
  • Hestum sem komnir eru á gjöf í hesthúsum skal gefið vel, hafa ljósin kveikt og útvarp í gangi. Eigendur ættu einnig að vitja þeirra á þessum tíma.
  • Gott er að gefa hestum vel sem eru á útigangi og halda þeim á kunnuglegum slóðum, þar sem þau fara sér síður að voða ef hræðsla grípur þau.

Frekari upplýsingar:
Áramót og áramótalyf
Áramótin nálgast
Dýrahald og flugeldar um áramót    
Dýrin hræðast flugelda og sprengjur um áramót

Gleymum ekki bestu vinunum