Ábyrgð á eigin heilsu

Fjöldi fólks gefur blóð í Blóðbankann en framlagið er ómissandi fyrir ýmsa starfsemi á sjúkrahúsum. Þá getur fólk fyllt út kort vegna líffæragjafa eftir andlát og gengið frá lífsskrá, skjali sem geymir óskir fólks varðandi lífslok.

Bólusetningar hafa verið almennar hér lengi og þátttaka mikil, einkum í bólusetningu barna. Þetta er mikilvægt þar sem farsóttum verður ekki haldið í skefjum nema þorri fólks sé bólusettur.

Þegar fólk verður fyrir áföllum þarf það að muna að nauðsynlegt er að ræða málin við sína nánustu og fá hjá þeim þann stuðning sem hægt er. Fyrir þá sem af einhverjum ástæðum geta ekki rætt við sína nánustu eru önnur úrræði í boði.

Ein mikilvægasta forvörnin og heilsuverndin sem hver og einn getur stundað er að fylgjast með andlegri og líkamlegri heilsu sinni.

Lýðheilsa er samheiti yfir heilsuvernd og forvarnir. Lýðheilsustarf miðar að því að viðhalda og bæta heilbrigði fólks og byggist á samstarfi ólíkra fræðigreina og tekur meðal annars til félags-, umhverfis- og efnahagsmála.