Barneignir

Barnabætur eru til þess ætlaðar að létta undir með barnafólki og jafna stöðu þess. Ákveðin upphæð er greidd til foreldra með hverju barni fram að 18 ára aldri.

Við fæðingu, ættleiðingu og varanlegt fóstur barns eiga foreldrar rétt á launuðu orlofi. Þeir fá greiðslur eða styrk úr Fæðingarorlofssjóði, eftir því hver staða þeirra á vinnumarkaði er.

Barnshafandi konur fá ókeypis mæðravernd, hafi þær átt skráð lögheimili hér á landi undangengna sex mánuði. Tilgangurinn er að stuðla að heilbrigði móður og barns með faglegri umönnun, stuðningi og fræðslu.

Barni á að gefa nafn áður en það nær sex mánaða aldri. Mannanafnaskrá hefur að geyma öll íslensk nöfn sem samþykkt hafa verið en sérstök lög gilda um nafngiftir.

Námsmenn fá dagvistun barna sinna niðurgreidda, hvort sem er hjá dagforeldrum eða á leikskólum.

Þeir sem vilja leita meðferðar við ófrjósemi geta snúið sér beint til Læknastöðvarinnar ART Medica sem starfar með leyfi heilbrigðisráðuneytis. Einnig má leita til síns læknis eða sérfræðings.

Gæta ber að ýmsu til að tryggja hreysti og velferð verðandi móður og barns hennar. Þar má nefna mataræði, andlega líðan og aðstæður daglegs lífs.

Ættleiðing barns er háð ýmsum skilyrðum og þarfnast góðs undirbúnings en grundvallarskilyrði er að hún sé barninu fyrir bestu. Þeir sem vilja ættleiða barn frá öðru landi snúa sér fyrst til Íslenskrar ættleiðingar.